நிலாக்கால நினைவுகள் !

செல்லும் இடமெல்லாம்

துணையாய் ! - எந்தன்

தனிமை வெறுமை போக்கினாய் !

சற்றே அயர்கையில்

மேகத்தினூடே ஓடியே

கண்ணாமூச்சி காட்டினாய் !

உன் முகம் பார்த்து

கட்டாந்தரையில் தலைசாயக்க

கதை பல பேசியே

கண்ணுறக்கம் ஊட்டினாய் !

இன்பக் கனவுகள் பல தந்து

இன்முகம் மனம் பதிந்து சென்றாயே !

அழகிய வண்ண நிலவே !

இவ்வார தினமணி கவிதை மணி பகுதியில் வெளியானது.

தாமரை

தாமரை இலைமேல்

தெறித்த நீர்த்துளியென

உள்ளக் கமலத்தில் 

மெல்லச் சேர்ந்தழுந்தும்

துன்பச் சுமைகளையும்

ஆத்திர சிலுவைகளையும்

வெறுப்பு மூட்டைகளையும்

வீம்பான பிடிவாதங்களையும்

புறந்தள்ளி - வாழ்வைக் கடக்க

கற்றுத் தேர்ந்தால்

மகிழ்ச்சி எனும் தங்கத் தாமரை

என்றும் நம் வசமே !

இவ்வார தினமணி கவிதைமணி பகுதியில் வெளியான கவிதை.