எளிமையின் விலை

இருக்குற சொற்ப

கையிருப்பத் தான் போட்டு

அன்னன்னைக்கு கிடைக்கும்

பண்டங்கள ஏலத்துல தானெடுத்து

ஓலைக் கூடையில தான் சுமந்து

வெயிலு ஏறுமுன்ன சந்தைக்கு

வந்து சேர்ந்து - இடம் தேடி

கோணி விரிச்சு கடை பரப்பி

கூறுகட்டி வச்சுக்கிட்டு

எட்டணா மட்டும் இலாபம் வைச்சு

விலை சொல்லி வித்தாக் கூட

முதலுக்கே மோசம் வருமளவுக்கு

பேரம் பேசி நிக்கிற மக்கா -

கண்ணாடி போட்டு மறைச்ச

குளிரான கடைக்குள்ள

பேரமே என்னன்னு தெரியாதது போல

சொன்ன வெலைக்கு வாங்கிப் போறீயளே

எளிமையில இல்லாத சுத்தம்

படாடோபத்துல இருக்குறதா

நினைக்கிறீயளோ - இல்ல

வெள்ளந்தி  ஏழை மக்க

ஏமாத்திப்புடுவாக - பகட்டான

மக்களுந்தான் நியாயமா நடப்பாகன்னு

நினைக்கிறீயளோ ??